مسلسل حقوق تائهة (10) الاستبداد

مسلسل حقوق تائهة ينشر على حلقات تباعاً على مدونون من أجل حقوق الإنسان

 حول المسلسل / العمل    لقراءة الحلقات السابقة

كتبها :  crestthebest

اخراج : MALAK & عربييي

عنوان الحلقة : الاستبداد

قصه واقعيه...

آخر ايام رمضان,,

اتعودنا انو ابوي يكون معانا بس الحمد لله على كل اشي, مات بعد رمضان قبل سنه...

اتخرجت جديد وطبعت شوية C.V يعني 200 تقريباً وبلشت الف على الشركات زي ( مندوبين المبيعات ( انعف ( يعني اعطي للشركات) سيفيهات )او بالاحرى اجلكم الخالق, زي ابو صابر الزلمه اللي كان يلف على البيوت هوه وصابر الحمار تبعه عشان يلم الخبز...

شنطة اللاب توب معي كلها وراق, على اساس العرط , يعني لو حدا خجلني حكالي شو نوع اللاب توب؟ كان قلتله A4 بدل ما قلوا p4

المهم قرفت حالي....... اسابيع بلف في الشوارع ومحسوبكم ولا مقابله, ولا اتصال حتى لو انه بالغلط.

طيب شو الحل؟

كان ابوي…. الله يرحمه ويجعل مثواه الجنه, يظل يحكيلي يابا: انت ما اتفكر لانه ازا فكرت بتخرب بيتنا...

واللي صار انه محسوبكم حرك الطاسه وفكر والنتيجه:

ياما كم معك فلوس؟

امي: والله ولا كرش,

محسوبكم: طيب متى الجمعيه تاعتك؟

امي (وحاسه بمصيبه ) والله ياما ياحبيبي كمان يومين كبل العيد, بدي اشتري لخواتك اواعي وعشان تروح اتعيد عماتك وخلاتك و و و و و ...(عيله بدون دخل بتعيد نسوان العيله) عادات باليه

انا .... ( بخباثه): عندي الك حل يا امي اخو شليته(باللبناني ) عشان اضحكها ,

هات ياما انت بس أومر(المسكينه بدها تراضيني, بأي وسيله, لانه كنت طالع من مصيبه, والله لطف في حالي كرمالها

ياما: بدي اسافر على دبي, وادور على شغل وانت دعواتك الي...

والله ولفيت عمان شبر شبر ادور على شركه تدبري فيزا بس ما لقيت...

وبدهاش طول سيره , دفعت 1000 دينار وأكثر عشان فيزا وتذكره لبلد حقوق الانسان...

المهم أول ساعة وصلت فيها , الابراج والبحر وكــــل اشي, قابلت من اول ساعتين الي في البلد...

ولفيت ورحت واجيت لحتى اشتغلت عند ارباب مال انا...

القانون قانون استعباد...

اول كم من يوم محسوبكم زي اللي متزوج جديد دوام لل 4.30 في قانون الشركه,

بعد اسبوعين,,

جهاد اليوم دوامك لل7 المسا ...... ماشي عنا ضغط شغل؟

الطرطور: ماشي ولو …. اثبات وجود للسنافر

ممنوع تاكل في الشركه, ليش بتاكل؟

لاني ببساطه جعان,,,

ما تجاوب...

المهم...

الكفيل هون زي اللي متزوجك, او بالاصح زي اللي مشتريك,,,

لو سمحت يا مدير ...... بدي افتح حساب في البنك,

طيب مش اليوم...

بدي افتح ملف للرخصه,,

بلزمكاش هسا...

بدي... ممنوع,,

يعني كل اشي بتحكم فيه...

لو سمحت مدير بدي اتحاولوا اتدبرولنا سكن رخيص...

بالله عليك؟ ليش انت بتفكر حالك دكتور كلك مدقق مش جايب همك...

طيب كنسلوني ( يعني اقيلوني ) بدي اشوف شركه تانيه,,

لا والله بتمزح ولا بتحكي جد؟ انا دافع 12 الف درهم عليك عشان تتركني, ابن المجنونه حسيته شاريني وبعاير فيي...

سكتت وحطيت بتمي كندره, لاني متغرب عشان امي وخواتي...

وصرت من جوا بدي افقع, وينك عزة نفسي وكرامتي ولا استر على اهلي...

وهي الايام بتمر والاسعار نار, الله وكيلكم البيض صار بورصه زي الذهب كل يوم شكل,,,

والطامه الكبرى انه بعد ما لقيت سكن رخيص ومنيح وخلال كتابتي لهاي الحلقة الواقعيه بدون تبهير,,,

دق صاحب الشقه علي وخبرني اخلي الغرفة خلال يومين, ولا بزت اغراضي في الشارع...

وخد فلوسك على داير ملين يا استاز جهاد, انا مش بايدي يا بش مهندس...

طيب اسكت الله ينكد عليك من الصبح حاس انه فيه مصيبة ,,,

احد مشاكل الشركات العربيه

لهون وبس لانه مش قادر اكمل اكيد التكمله عندكم...

يتضمن الاعلان العالمي لحقوق الانسان في المادة رقم 1 ما يلي :

المادة 1يولد جميع الناس أحراراً متساوين في الكرامة والحقوق، وقد وهبوا عقلاً وضميراًوعليهم أن يعامل بعضهم بعضاً بروح الإخاء.

مهمة تسهيل القتل ( كاريكاتير )

16/06 من كل عام ... اليوم العالمي للطفل الافريقي

هل تعلم بان للطفل الأفريقي يوم خاص به ... الغاية منه تذكير العالم بمسئولياتهم الاخلاقية و الادبية تجاه ما يعانيه هذا الطفل ...

كثيرون سيقولون ماذا من الممكن ان نفعل لأجله و في بلادنا اطفال لايقلون معاناة عن معاناته ... او ان الالتفات الى قضايا مجتمعنا الداخلية يعتبر اولى و اهم ...

ها انت قد علمت انه يوجد يوم خاص للطفل الافريقي ... دع الاخرين يعلمون حول ذلك اليوم - فقد يكون احدهم قادرا على فعل شيْ من أجلهم ...

تتميز خاصية الشبكات الاجتماعية بميزة مخاطبة العالم من خلال خدمة الشير فقد يكون احد اصدقائك مهتم بما انت منشغل عنه ...

انا ضد الحكومة ... كلمات جميلة و مؤثرة

كلمات اغنية جميلة ساهمت في تاجيج ثورة القرن المصرية التي اسقطت اخر فراعنة مصر ...
انا ضد الحكومة ... كلمات جميلة للشاب الاسكندراني رامي دنجوان قام بادائها باسلوب الراب ... وجدت قبولا و استحسانا كبيرا لدى شباب الثورة المصرية ...

ضد الحكومة 
ضد البلطجة والظلم 
ضد الحكومة 
ضد الحاكم ضد الحكم 
ضد الحكومة وحبل الظلم طويل 
ضد الحكومة وعندى ألف دليل

دمك مسيحينه 
قتلك محللينه 
وطنك مبهدلينه 
دينك مستهدفينه 
صوتك هما اللى كاتمينه
حقك كمان واكلينه
واخوك لسة قاتلينه 
وباقى الشعب طالع عينه 
لو عشت تعيش هفية
لو مت ملكش دية 
تتكلم تبقى ضحية
تتعامل بوحشية 
سياسة بلطجية 
شوية عصبجية 
حكومة عدوانية 
عايزة تنهش فيك وفيا 
الظالم والمظلوم 
الحاكم والمحكوم 
لمين بس حاشكى وعلى مين انا هالوم؟
هالوم ع الشعب اللى بياخد باوسخ جزمة ولسة ساكت؟
ولا على حكومة سايقاها وقلوبها ماتت؟ 
فلتسقط الحكومة 
فليسقط النظام
فليسقط القانون 
فليسقط الحكام 
فليسقط الجبان 
فليسقط الخان 
وليسقط الطيب لو طيبة حاتخليه يتهان

انا ضد الحكومة 
ضد البلطجة والظلم 
ضد الحكومة 
ضد الحاكم ضد الحكم 
ضد الخائن والجبان 
ضد اللي يقبل يتهان

كل من هب ودب يهينك 
دلوقت عمال بيهينك 
ملكش قيمة ما لك شئ ثمن
ومغفلينك , مستغفلينك
وفي احضان اعادئك 
وماسكينك من ايديك اللي بتوجعك 
حواليك الف ( 1000 ) افعى 
وفي مقتل عماله تلدغك 
مهما تتالم
ما فيش حد ناوي يسمعك 
ما تساعد نفسك
ما تقولي وايه اللي يمنعك 
لو حد زئك
مستنى مين يجبلك حقك؟
ماسكك ودئك
بقى له 30 سنة بيدئك
عمال يسكك 
وانت ساكت ومخيط بقك ومموت مخك 
كل من هب ودب يهينك 
كفاية نوم 
كفاية سكوت
كفاية موت 
لو عندك دم 
انا ضد الحكومه لأن لي قيمه 
ضد الحكومة وصعب اقبل بالهزيمة

تضامناً مع لاعب كرة القدم الفلسطيني الاسير المضرب عن الطعام محمد سرسك

Also...Michel Platini, Président de l'UEFA: Agir pour sauver la vie de Mahmoud Al-Sarsak, footballeur Palestinian

Change.org|Online Petition Form

ثمن الحرية مكلف جداً في سوريا ( صورة )

مسلسل حقوق تائهة (09) عمالة الاطفال

مسلسل حقوق تائهة ينشر على حلقات تباعاً على مدونون من أجل حقوق الإنسان

 حول المسلسل / العمل    لقراءة الحلقات السابقة

كتبها واخرجها : عربييي

عنوان الحلقة : عمالة الاطفال

كل يوم الصبح بعد ما بياع الحليب يقلق اهلي وهو بنادي على الحليب ( حليبنا - وادي فاطمة للحليب الطازج ) يوميا من ا لمزرعة

لازم اصحى زي المصروع ...

بقوم ( برشق ) كاسة مي على وجهي ( وبفلّي ) حالي باستخدام مشط ( سن الفيل) وبلبس الاواعي اللي كل يوم بلبسها وبنطلق عالشغل حوالي الساعة 7 ....

كالعادة وانا رايح عالشغل بشوف صحابي اللي كنا نلعب انا واياهم بالحارة واحنا صغار كلهم حاملين شنتات ورايحين عالمدارس ,

اواعيهم ما عليها شحمة زي اواعيي رايحين يضحكو عمدارسهم ...

مش زيي رايح اتشعتل بين العجال وبين ماتورات السيارات ...اول ما بوصل الشغل لازم اوكل كف تصبيح من معلمي مشان اتنشط...

بقعد شوي لحتى يروق معلمي ويشرب كاسة القهوة تبعتو ( قهوة صب مش غلي لأنها ارخص كنت مفكر زمان انو المعلم = الاستاذ ... بس لأ مش هيك طلعت ...

الاستاذ لصحابي والمعلم الي ...

مبارح اجت سيارة ( واقعة ) ابصر شو فيها خربان , قاللي المعلم انو انزل تحتيها افك اكمن برغي ,

نزلت انا طبعا مع اني بخاف انزل تحت السيارات بس كمان اذا ما بدي ارد رح يضربني المعلم ورح يطردني من الشغل ولما اروح احكي لأبوي اني انطردت من الشغل رح يموتني من القتل ورح يطردني برا الدار ...

وانا تحت السيارة بفك بالبراغي ربي رحمني انو صاحب السيارة قاعد فيها لأنها دحلت علي ولولا صاحب السيارة وقفها والا كان انا رحت بخبر كان ...

انواع الزباين :-

اللي بكون عامل حالو حدق وفهمان بكل اشي......

وبكل اشي بسأل وبحشي راسو بين المعلم والقطعة …. عالاغلب بكون ناصح والو كرش

الهبيلة اللي لو تقوللو بدك ماتور لأنو العجل مبنشر بقوللك طيب سوي اللي بتشوفو مناسب

الكحتة : هاظ بكون مفكفك كل برغي ممكن انو الميكانيكي يطلب اجرة عليه حتى لو ربع نيرة

الفهمان : وهاظ اكثر واحد بطعّم ( يعني يشتمه ) عليه المعلم

وقت الظهر بكون فش حركة كثير ,

فبقعد باب المحل وبتطلع على طلاب المدارس وهمه مروحين ,

كان نفسي اكون معهم بس ابوي حكالي انو لازم اشتغل واجيب مصاري وانو الدراسة مخسر عالفاضي ,

لما طلعني من الصف الخامس حكالي يا بتجيب مصاري لهالبيت يا بتروح تشوفلك فندق تنام فيه ...

مش فاتح أوتيل انا وانا قاعد باب المحل سمعت صوت كندرة طايرة وجاي علي ,

واول ما لفيت وجهي لقيت اشي اسود مكتوب عليه 44 لخم بوجهي ونيمني عظهري ..

المعلم : ولك قاعد بتتفرج عالرايح والجاي يا ابن ال**********

وانا بدفعلك راتب مشان تيجي تقعد

انا : طب مهو يا معلمي ما في اشي اشتغلو
المعلم : اذا ما في اشي تشتغلو روح نظف الشحمة عن الارض
انا : ليش هي الشحمة بتروح عن الارض , والا الشغلة تعجيز يعني
المعلم : ولك لا تناقش يا حمار يا ابن ال********* يا ********

اعمل اللي بحكيلك اياه وبس وما باليد حيلة ...

بروح عالدار بلاقي ابوي ماددلي ايدو.........

بدو المصاري اللي اشتغلت فيهن ولما احكيلو جوعان بدي اوكل بحكيلي بتخلي معلمك يطعميك بالشغل مش فاتحها مطعم انا ...

مش عارف يعني اذا الدار ما بنوكل فيها ولا بننام فيها , ليش اسمها دارنا لعاد

يتضمن الاعلان العالمي لحقوق الانسان في المادة رقم 26 ما يلي :
المادة 26 ( 1 ) لكل شخص الحق في التعلم، ويجب أن يكون التعليم في مراحله الأولى والأساسية على الأقل بالمجان، وأن يكون التعليم الأولي إلزامياً وينبغي أن يعمم التعليم الفني والمهني، وأن ييسر القبول للتعليم العالي على قدم المساواة التامة للجميع وعلى أساس الكفاءة.( 2 ) يجب أن تهدف التربية إلى إنماء شخصية الإنسان إنماء كاملاً، وإلى تعزيز احترام الإنسان والحريات الأساسية وتنمية التفاهم والتسامح والصداقة بين جميع الشعوب والجماعات العنصرية أو الدينية، وإلى زيادة مجهود الأمم المتحدة لحفظ السلام.( 3 ) للآباء الحق الأول في اختيار نوع تربية أولادهم.

مسلسل حقوق تائهة (08) الحق في الحصول على عمل

مسلسل حقوق تائهة ينشر على حلقات تباعاً على مدونون من أجل حقوق الإنسان

 حول المسلسل / العمل    لقراءة الحلقات السابقة

موضوع الحلقة : معاناة الخريجين الجامعيين

كتبها : Geronimo

اخراج : MALAK + عربييي

ألف ألف مبروك جهاد التخرج ,..

الله يبارك فيك عمي أبو يعقوب …

الكنافة يا ولد …

اه ياجهاد ..

وين رح يشتغل ؟؟

بما اني حامل بكالوريس في المحاسبة …

بلكي قدمت طلب في ديوان الخدمة وطلعي تعيين .

ان شاء الله خير.

وبعد اسبوعين من اللف والدوران على الجامعة وتصديق الشهادات والصور …

طلع جهاد على ديوان الخدمة وعبى طلب …

واضطر انو يرجع مرتين عشان اوراق ما إلها داعي…

كل اللي في القصة إنو الموظف روحه طالعة من الشغل وقرفان هالعالم ومحملهم جميلة إنو بدخل طلباتهم على الكمبيوتر .

وبعد انتظار شهر طلع رقم جهاد في الدور 125 …

وكان شي منيح ..

لأنو مش رح يستنى كثير لحد ما يجي دوره ..

فقرر انو يطلع يدور على شغل بالقطاع الخاص لحد ما يطلعله تعيين كل يوم من الصبح يطلع على الشركات ويقدم طلبات ..

ياما عبى طلبات على اشي فاضي …

فقع جهاد …

ولأنو زهق ..

قعد بالدار كل يوم يشتري الرأي ويجيب جريدة الوسيط …

وفجأة وجه جهاد فتّح .. ( تقول لقى مصباح علاء الدين )) وقعت عينه على اعلان دورات في المحاسبة بقصد التشغيل …

والمسكين راح سجل فيها ..

وانتظم شهرين ودفع 400 دينار …

ولما انتهت الدورات حكوله انه حاليا ً ما في شواغر ..

وانهم اخذو رقم تلفونه ورح يحكو معاه اول واحد …

(( نفس الكلام اللي حكوه للخمسين متدرب اللي كانو معاه )) .

ورجع عالدار مهموم …

بس صدفة لقى اعلان انو في تعيينات للمحاسبين …

وطلع على الديوان يستفسر ..

ومتحكي كل الناس في الديوان للاسف ما وصله دور …

بعده دوره 18 …

يعني التعيين الجاي دوره …

فراح اشتغل عند ناس معارف ب 120 دينار ..

يا دوب يكفوه مواصلات وسندويشة فلافل وبكيت دخان . ونحتو عليه شي اربع شهور لحد ما طلع تعيين جديد …

ومع هيك اسمه ما طلع معهم .

طلع كمان مرة يستفسر ..لقى انو دوره 69 …

- عفوا ًَ بس دوري كان 18 اخر مرة .

- عفوا ً ...

هذا دورك الجديد ...

لا تناقش خيو (( شكلو الموظف امه سوريه )) او بحضر مسلسات سورية كثير .

ورجع جهاد عالبيت مقهور ...

واستفسر من ناس وحكوله إنو الواسطة بتلعب دور ...

ايييييه يلعن أبو الواسطة .

. حتى بهاي ؟؟ وفقد الأمل وما لقى جهاد من هالمعاناة الا انو يطلع على دولة خليجية يشتغل ..

غاب سنتين ...

ورجع زي ما طلع كل اللي في القصة انهم ضحكو عليه ...

المكتب اللي دفعله اول راتب عشان يلاقولو شغل عينوه بالسعودية بقرية ولا فيها من معالم الحضارة اشي ...

والمدير الهندي نحت عليه ليل نهار ووقت اضافي بدون راتب ..

لحد ما مرض جهاد ...

ولأنو غاب عن الشغل يومين ... طردوه من شغله ..ورجع على عمان ...

واتصل بعمو ابو يعقوب وراح يشتغل معاه ميكانيكي ...

ويلعن أبو الشهادة .

جاء في قانون العمل الأردني

المادة 22:

1. لكل أردني حق في تولي المناصب العامة بالشروط المعينة بالقوانين أو الأنظمة .
2. التعيين للوظائف العامة من دائمة ومؤقتة فيالدولة والإدارات الملحقة بها والبلديات يكون على أساس الكفايات والمؤهلات

مادة 23 :

1- العمل حق لجميع المواطنين وعلى الدولة أن توفره للأردنيين بتوجيه الاقتصاد الوطني والنهوض به

2 - حمي الدولة العمل وتضع له تشريعا ًيقوم على المبادئ الآتية :

أ- إعطاء العامل أجرا يتناسب مع كمية عمله وكيفيته

ب- تحديد ساعات العمل الأسبوعية ومنح العمال أيام راحة أسبوعيةوسنوية مع الأجر .

ج- تقرير تعويض خاص للعمال المعيلين ، وفي أحوال التسريحوالمرض والعجز والطوارئ الناشئة عن العملد- تعيين الشروط الخاصة بعمل النساء والأحداث

هـ خضوع العامل للقواعد الصحية 

و- تنظيم نقابي حرضمن حدود القانون

مسلسل حقوق تائهة (07) المعاملة اللاانسانية

مسلسل حقوق تائهة ينشر على حلقات تباعاً على مدونون من أجل حقوق الإنسان

 حول المسلسل / العمل    لقراءة الحلقات السابقة

موضوع الحلقة : اساءة معاملة المراكز الامنية للمواطنين

كتبتها : كلارا

أخرجها: MALAK & عربيي

جهاد وملاك إخوة ,,

سافروا يدرسوا بإحدى الدول العربية ,

لإنو ما طلعلهم مقعد بالأردن بالتنافس لإنهم ما جابو معدلات منيحة أبوهم مستأجرلهم شقة عند الجامعة ..

جهاد مقضيها لعب وسهر و حكي فاضي و لما يتصل أبوهم يتطمن عليهم,,

بيقولو: آه يابا ,,

كل شي تمااااااااااااااااااااااااام !!

و ملاك الشطورة ,

قررت تصلح الغلطة اللي غلطتها بالتوجيهي ,

وتدرس منيح عشان تصير محامية أد الدنيا المهم ,,

السيد جهاد ,,

كل ليلة سهر مع أصحابو برة,,

و لعب شدة للفجر ,,

و أرجيلة و دخان ,,

و تارك ملاك لحالها يا حرام بالبيت ..

وكل ميرجع ,,

بتعمللو ملاك عرس مطنطن ,,

عشان يلتهي بدراستو ويترك الشلة اللي ماشي معها ,,

بس هو أبدا,,

لا حياة لمن تنادي وفي يوم من الأيام ,,

تأخر جهاد بالسهر كتييييييييييييير ,,

و صار يحاول يألف شي كزبة يحكيها لملاك عشان ما تعمللو مشكلة زي كل يوم ..

فتح جهاد باب الشقة ,,

و هو متأهّب لمشكلة ,,

و راح دغري عند ملاك يورجيها إنو مش خايف منها ,

ومستعد يتمشكل !!

لقي ملاك هيك: جهادخاف !!

قالها ملااااك,,

شومالك؟؟

شوصار ..

وهي أبدا ,

,لا من تمها ,,

ولا من كمها ,,

ضلت هيك وبعد م أشبعها كفوف على وجهها و كب مي عليها ,,

(عشان تصحى,, مش عشان يطلّع القديم و الجديد لا سمح الله)

بالآخر الحمد لله ,,

نطقت ملاك ..

ملاك: لوتشوف ياجهاد شو شفت اليوم بالأخبار جهاد:أخبار؟؟

ليش من متى بتحضري أخبار إنتي؟؟

مهو ليلك نهارك عالأغاني والمسلسلات و الحكي الفاضي ( طبعا جهاد م صدّق)

ملاك: ليش في حد بيفتح هالقنوات غيرك جهاد: ييييييييييي نسيت ,,sorry !!

المهم,,

شوجابو بالأخبار؟؟

ملاك: جابو قصة واحد كان بالسجن,,

بتعرف ليش انسجن؟؟ قال كان بالسيارة تبعتو,,إجا شرطي سألو سؤال ,,

حتى نسيت شو هو السؤال,,

حكالو الزلمة :ليش بتسأل؟؟انجن الشرطي ,,

أخدو عالمركز ,, وحبسو على ذمة التحقيق ,,( بدون أي تهمة ,, سوى إنو سألو: ليش؟؟ )

و استنى لما الشر

طيين روّحو ,,

واستفرد فيه ,,

قالو أنا ينقاللي ليش ؟؟

ماشي ,,

بلّش يضربو و يعّذب فيه ,,

وهداك يصرخ من الوجع وكان الشرطي جايب معو قميص نوم ,,

و شلحو تيابو ,,

و لبسو قمص النوم ,,

وأخدو بسيارةالشرطة عند الورشة اللي بيشتغل فيها الزلمة ,,

و نزلو من السيارة ,,

و صار يضرب فيه بالعصاية ,

يحكيلو: قول أنا سلوى ,,

قول أنا مريم ,,

بصوت عالي !!!

والضرب بالعصاية نازل عن جنب وطرف عليه و بعد هالحكي ,,

صار جهاد هيك يا ويلو هالشرطي من الله !!!!

على فكرة ,, القصة حقيقية

المادة 5 من الاعلان العالمي لحقوق الإنسان:

لايعرض أي إنسان للتعذيب ولا للعقوبات أو المعاملات القاسية أو الوحشية أو الحاطة بالكرامة.